МОЛИТВА

О незлобивая и кроткая, предивная старице, преподобная мати Рахиле, новая чудотворица и молитвенница за род христианский!
Се мы, грехми и треволненьми житейского моря обуреваемии, от глубины сердечныя взываем ти: не остави нас, немощных, печальных и унылых призрением милостивнаго твоего заступления!
Во дни земнаго жития твоего явилася еси болящим безмездная целительница, заблуждшим наставница, скорбящим и обидимым утешительница милосердная и всем притекающим к тебе скорая помощница и чадолюбивая мати. И ныне вемы, яко дана тебе от Господа и Пречистой Богородицы благодать молитися за ны.
О верная слуго Христова, сторицею возрастившая данный тебе талант, уврачуй страсти душ и телес наших; укрепи нас в добродетели и настави на путь покаяния; умягчи наша злая и хладная сердца, да паче всего возлюбим Спасителя нашего, Иисуса Христа, и ближняго своего; умоли Господа сил пробавить милость Свою на многострадальном Отечестве нашем и на святей обители сей, в ней же подвизалася еси, да тихое и безмолвное житие поживем во всяком благочестии и чистоте, и тако достигнем в немятежное пристанище Небесного Царствия, идеже ты в незаходимей сияеши славе, воспевая со всеми святыми хвалебную песнь Отцу и Сыну и Святому Духу, всегда, ныне и присно и во веки веков. Аминь.